COMES

I.

COMES

Metallorum per Illyricum, ex auro in metallis invento portionem Principum debitam exigebat, in fluminibus etiam vel fodinis aurum legentes: sub dispositone Comitis sacrarum Largitionum, Notit. Imper. Vide l. 1. Cod. de Metallar.

II.

COMES

apud Papin. Statium, l. 5. Sylv. 2. v. 60.

Haec iterent Comites praecepta senesque paterni.

Et l. 9. Thebaid. v. 580.

Saepe novos nati bellô rediisse triumphos

Armaque, et alipedem notum, Comitesque videbat.

Moderator, inspector est: Graece Παιδαγωγὸς, Atheniensibus Α᾿κόλουθος, antiquioribus Α᾿οιδὸς, item Εὐνοῦχος, Custos quoque et Paedagogus Latinis. Α᾿κόλουθοι certe apud Platonem saepe tales dicuntur. Hinc Alcibiades in Convivio, negat se, quod formosus esset, absque Α᾿κολούθῳ, primo Socratem adire ausum fuisse. Nempe ab antiquissimis temporibus, Poetae Virique sapientes vitae hominium adhibiti sunt, ut minores in primis, qui modum vitae nondum poterant habere, instituerent, et temperantiam eos ante omnia docerent. Ideoque ingenuorum liberis ante pubertatem statim solebant praefici, ut viderent ne auderent ii τῆς ὥρας χαρίζεςθαι. Comites itidem dixit Virg. l. 5. Aen. v. 545.

At pater Aeneas, nondum certamine missô,

Custodem ad sese comitemque impubis Iuli

Epitidem vocat ---- -----

Iidem Heroes ad bellum euntes sequebantur: uti de Phoenice Pyrrho dato legimus apud Homerum, et ex eo Statium praefatum, Propemptico Crispim. Vide Casp. Barthium in Adversariis; item Animadversionibus ad Statium passim. Similes his erant, quibus Matronae καὶ τὰ Γυναικεῖον committebantur, qualis celeberrimus ille Homeri fuit Od. γ. qui Α᾿οιδὸς ab illo dicitur, quo de ministerio fuse diximus supra, in voce Cantor. Nec defuêre puellis Virginibusque sui comites custodesque, de quibus dicemus aliquid infra, ubi de Atheniensium Oecuria. Hodie Comes, dignitatis nomen est de qua, in voce Comites.

III.

COMES

seu Liber Comitis, Papiae vocatur congregatio caelestium Lectionum. Quibus verbis innuitur Lectionarius, cui id nominis inditum iam A. C. 471. probat. Car. du Fresne ex Charta Donationis Eccles. Cornubianae hôc annô scriptâ, et editâ a Suaresio, Item Codices, Euangelia 4. Apostolum, Psalterium et Comitem. Sic autem appellatus is liber, vel quia Ecclesiastici eum ut comitem semper habere debent, ut loquitur Phocas Grammat.

Te longinqua petens Comitem sibi ferre viator

Ne dubitet; parvô pondere multa vehes.

Vel quod ad Comitem scriptus dicitur in antiqq. MSS. in aliis liber Comiti inscribitur. Servatur in Bibliotheca Ecclesiae Bellovacens. Codex Euangeliorum MS. 9. saecul. quibus subditus legitur Comes, hôcce titulô: In Christi nomine anni circuli liber Comitis incipit, auctus a Theotincho, indigno Presbytero, rogatu ----- Hechiardi Comitis Ambianensis: Ita tamen, ut sancta Euangelistarum dicta, nec non et Apostolorum et Prophetarum immota atque inconcussa servarentur etc. Vide Cat, du Fresne in Glossar. et infra in voce Lectio, item Lectionarius.

IV.

COMES

vide Comites.